အမေက ငါ့နားရွက်တွေကို ဖြတ်စားတယ်
မရည်ရွယ်ပါဘူး နေထွက်အပင်ရဲ့အရိပ်မှာ
သစ်ခေါင်းအသိုက်ထဲ ထိုးဆိတ်နေတဲ့ တကျီကျီငှက်
အမေ မဝမှာစိုးလို့ တခေါင်းလုံးပြောင်တလင်းခါတဲ့အထိ
ငါ့လျှပ်စီးဆံပင်တွေ ရိတ်ကျွေးပစ်လိုက်တယ်
ငါ့ကိုလှတယ်လို့ထင်တဲ့ အမေ့ရဲ့မျက်လုံးနှစ်လုံးကိုတော့
မနက်ဖြန်စာများအတွက် ငါဖြုတ်ရောင်းထားပြီးပြီ
တွေ့ကရာအမှောင်နဲ့ လင်ငယ်နေပစ်တဲ့ စိမ်းလန်းနေဝင်အပင်
အိမ်ရှေ့ကသွေးပုပ်မြောင်း စီး၊ မစီးလည်း မသိတော့ဘူး
အပြင်ထွက်တဲ့အခါတိုင်း လူကောင်းလေးလို့အထင်ခံရဖို့
အဲဒီသွေးပုပ်မြောင်းထဲ
ငါ့ခြေထောက်တဖက်ထားထားခဲ့ရတာပဲ ငါသိတယ်
အမြင်ခိုင်မာ အတွင်းဗလာ ကြောင်အိမ်ကြီးကို နေ့စဉ်ထမ်းပိုးပြီး
ပင်လယ်ကမ်းစပ်မှာ သွားသွားချထားရတယ်
လှိုင်းဖွေးဖွေးတွေ ကြောင်အိမ်ထဲ ထုံးစံအတိုင်းရောက်လာရင်
ပင်လယ်ကိုထိုးဟောင်နေတာရပ်ပြီး အိမ်ပြန်နေကျ
ဘယ်လမ်းဘေးမှာမဆို အမှန်တရားအမှိုက်တွေချည်းပဲ
အိမ်ပြန်ရောက်တော့
အမေ့တကိုယ်လုံး လေစားလို့ အရိုးပဲကျန်တော့တယ်
အရိုးတွေကြားထဲ လေတိုးနေသံဟာ တယောသံ
တမြို့လုံး အပျင်းပြေ လာနားထောင်ကြတယ်
အိမ်ပြန်ရောက်လာတဲ့ကြောင်ကိုသတ်ပြီး
ဧည့်သည်တွေကို ငါချက်ကျွေးလိုက်တယ်
ငါ့ခေါင်းပေါ်ကကြောင်မွှေးတွေကို ပွတ်သပ်ပြီး
သူတို့ ဆူဆူညံညံ ပြန်သွားကြတယ်
အဲဒီည၊ ငါတို့မြို့မှာ လောက်မိုးတွေရွာတယ်
တမြို့လုံးလင်းထိန်ငြိမ်သက်လို့
လောက်တွေရဲ့ အလင်းရောင်ဖွေးဖွေးမှာ
ငါ မမြင်ဖူးတာတွေ မြင်လိုက်ရတယ်။
ရှိန်ဝါ
၂၀၁၆ ဖေဖော်ဝါရီ ၆
No comments:
Post a Comment