ငါ့မိန်းမက ရေခဲတုံးလေးမွေးတယ်။
သူ့ရင်ထဲက ကျန်ရှိရေခဲတောင်အစိုင်အခဲကိုတော့
ငါက ကိုယ်တုံးလုံးနဲ့ မသိချင်ယောင်ဆောင်ထားမိ။
ဖန်နဲ့လုပ်ထားတဲ့ စာခြောက်ရုပ်ကို
ကောင်းကင်လို့ အထင်မှုား ၊ ဝင်အောင်းကြတဲ့ငှက်တွေ။
ဘီးတပ်ကုလားထိုင်ပေါ်က ငှက်မလေးကသာ
သွေးကြည်ရာ အရိုးနုရာကိုတွေး
မြေခွေးတကောင်အဖြစ် အသွင်ပြောင်းချင်နေတာ။
လေယာဉ်ပြတင်းပေါက်ကနေ ပါလေရာဆီတွေ လောင်းချတယ်
လေထုထဲ ဆီတွေဝေ့နေရင်
လိုရာခရီးကို ချောချောမောမောဆိုက်ရောက်မယ်လို့
လေယာဉ်တစီးလုံးကို အယုံသွင်း ကြေငြာနိုင်ရမယ်။
မျက်နှာကျက်မှာ ကပ်ထားတဲ့ မီးစုန်းကြယ်အတုလေးတွေ
ကြာလာတော့လည်း အိပ်ရာပေါ် တခုချင်း ပြန်ပြုတ်ကြ
ဖိနပ်စုတ်တွေကို လေထဲပစ်မြှောက်လိုက်ကြတော့
အရိပ်တွေဟာ ကြမ်းခင်းမှာ လှပစွာကခုန်။
ဟိုဖက်ကမ်းကထောင်ထားတဲ့ မှန်ကို ကြည့်ပြီး
ဟိုဖက်ကမ်းမှန်ထဲက ဒီဖက်ကမ်းကို
ဒီဖက်ကမ်းက ဟိုဖက်ကမ်းလို့ ထင်နေတယ်။
ရှိန်ဝါ
၂၀၁၆ ဧပြီ ၂၁
No comments:
Post a Comment