ဒီထဲကို ဘာလုပ်ဖို့ဝင်လာတာလဲ။ ဘယ်သူကလွှတ်လိုက်တာလဲ။
လူတွေဟာ ဒီထဲကိုရောက်ရင် တခုခုတော့ ရွေးချယ်ဝယ်ယူနေကျပဲဆိုတာ မသိဘူးလား။ ခင်ဗျားက လူလား၊
မျောက်လား။ ခင်ဗျား အခု ပန်းခင်းထဲရောက်နေတာကိုရော သိလား။ ဗိုက်ဆာနေလို့လား။ ခင်ဗျားကို
ဘယ်သူက လွှတ်လိုက်တာလဲ။ ခင်ဗျားဘာသာခင်ဗျား လာတာလား။ ခင်ဗျားပြောတဲ့စကားကို သူတို့ နားမလည်ဘူးဆို။
ခင်ဗျား တွေ့သမျှတံဆိပ်တွေလိုက်ဖြုတ်ပြီး
ဘာလို့ဝါးစားတာလဲ။ ခင်ဗျား တခုခုတော့ ရွေးလိုက်သေးတယ်မလား။ ဒီနေရာမှာရွေး ဟိုနေရာမှာပစ်ချလုပ်တယ်ဆို။
ဝါယာကြိုးတွေကိုရော ဘာလို့ဝါးတာလဲ။ အင်္ကျီကိုချွတ်ပြီး ဘာလို့ ပြောင်းပြန်ဝတ်လိုက်တာလဲ။
ဘာလို့ ထိုင်လိုက်ထလိုက် ငှက်ပျံသလို လုပ်နေတာလဲ။ ခင်ဗျား မတ်တပ်ကြီး မျက်စိတွေမှိတ်ပြီး
အိပ်နေသေးတယ်ဆို။ ခင်ဗျား အဲလိုလုပ်နေတာ မြင်တဲ့သူတွေက ဘာမှမပြောကြဘူးလား။ ခင်ဗျား
ရုပ်ရှင်သရုပ်ဆောင်နေတယ်လို့ ထင်ကြလို့လား။
ခင်ဗျား ဘာလို့ အကျယ်ကြီး ထရီတာလဲ။
ဝိုင်းကြည့်တဲ့လူတွေကို လိုက်ပြီး ဘာလို့ ကထိထိုးတာလဲ။ သူတို့ ကြောက်ကြောက်လန့်လန့်နဲ့
ငိုတာ ခင်ဗျား မတွေ့ဘူးလား။ ခင်ဗျား အခု ကန္တာရထဲရောက်နေတာကိုရော သိရဲ့လား။
အဲဒါတွေလည်းပြီးရော ခင်ဗျား ရုတ်တရက်ကြီး
ဘာလို့ ဒီထဲမှာ သေးနဲ့လျောက်ပန်းရတာလဲ။ ခင်ဗျား သေးနဲ့ ကြမ်းပေါ်မှာ သရုပ်ဖော်တာ ပြုံးနေတဲ့ပုံဆို။
ဘာသဘောလဲဗျ။ လုံခြုံရေးရဲတွေရောက်လာတော့ ခင်ဗျားက အရင် ဘီစကစ်တွေနဲ့ ပစ်တယ်ဆို။ တွေ့သမျှအရုပ်တွေနဲ့
ပစ်တယ်ဆို။ အဲဒီအရုပ်တွေထဲမှာ ဘုရားရုပ်တွေပါတာကိုရော သိလား။ ခင်ဗျားက အလင်းရောင်ကိုလိုက်ရှာပြီး
ပြေးတာဆို။ အဖမ်းခံတော့လည်း အသာတကြည်နဲ့ အဖမ်းခံတယ်ဆို။ အဖမ်းခံတော့ ခင်ဗျားက အပေါက်ဝနားတောင်ရောက်နေပြီဆို။
ခင်ဗျား ကျွန်တော့်အတောင်ပံတွေကို မြင်လား။
ခင်ဗျားရဲ့ သေးစိုဘောင်းဘီ ကျွန်တော့်ကို ပေးပါလား။ ဝါးဖို့ ဝါယာကြိုးတွေကျန်သေးလားဗျ။
ကျွန်တော် ရေဆာတယ်ဗျာ။ ပန်းတပွင့်လောက်ရွေးပေးပါလား။
ရှိန်ဝါ
၂၀၁၅ စက်တင်ဘာ ၁၈
No comments:
Post a Comment